|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 307 Hüküm no: 642 Orijinal metin no: [56b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe bt. İshak’ın ölen âzatlı cariyesi Server Hatun bt. Abdullah’ın mirasçısı olduğu
Vech-i tahrîr-i sicil budur ki Üsküdar Zaîmi Alagöz Bey b. Abdullah meclis-i şer‘a hâzır olup Ayşe bt. İshak muvâcehesinde senin tasarrufunda olan o fevt olan Server Hâtun bt. Abdullah’ın mülküdür fevt olup vârisi yokdur beytülmâldir deyu taleb ederim dedikde, mezbûre Ayşe dedi ki, müteveffâ Server benim câriyem idi ba‘dehû mu‘takamdır deyip mezbûr zaîm inkâr ile cevâb vericek mezbûre Ayşe’den sıdk-ı makāline muvâfık beyyine taleb olundukda udûl-i müslimînden Mevlânâ Abdi Halîfe b. Dede ve Mustafa b. Mehmed nâm kimesneler dediler ki müteveffâ Server Hâtun bt. Abdullah işbu Ayşe Hâtun’un câriyesi ve mu‘takasıdır deyu şehâdet-i şer‘iyye edâ ettiklerinde ba‘de’t-tezkiye hayyiz-i kabûlde vâkı‘olup bi’t-taleb kayd-ı sicil olundu. Vaka‘a’t-tahrîr fî evâili Cemâziyelâhir sene 971.
Şuhûdü’l-hâl: Mehmed b. Abdi ve Ömer b. Şem‘i, Sinan Bey b. Abdullah Silâhî, Eymir b. Sevindik, Ali b. Hacı Fakih, Hüseyin b. Ali ve gayruhum
|