|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 326 Hüküm no: 695 Orijinal metin no: [62b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sedef bt. Odel’in, kızı Nefise bt. Halil’in oğlu Mustafa’ya ev ve avlu hissesini sattığı
Vech-i tahrîr-i sicil oldur ki Nefs-i Üsküdar’da sâkine olan Sedef bt. Odel meclis-i şer‘-i şerîfe hâzıra olup mezbûre hâtunun kızı olan Nefîse bt. Halil’in oğlu olan Mustafa muvâcehesinde tâyi‘an ikrâr ve i‘tirâf dedi ki, kızım Nefîse ile ale’l-iştirâk mutasarrıf olduğumuz bir taraf İskender b. Abdullah havlusuyla ve bir taraf Budak Çelebi havlusuyla ve bir taraf Hamza Güleğüş havlusuyla ve bir taraf Börekçi Hüseyin b. Abdullah havlusuyla mahdûd ve mümtâz olan havlu ki içinde bir çatma eviyle zikr olan havlunun nısf hissemi işbu sâhibü’s-sicil Mustafa’ya dört yüz akçeye bey‘-i bâtla bey‘ edip teslîm-i mebî‘ edip semen-i merkūmu alıp kabz eyledim min ba‘d taht-ı tasarrufunda olan mezbûr Mustafa dahi beni ölünce göre mezbûrdan deyu ikrâr-ı sahîh-i şer‘î edicek Mustafa dahi vicâhen ve şifâhen mukırr-ı mezbûrenin ikrârın tasdîk ve tahkīk ettikden sonra sıhhat-ı bey‘ ve şirâya hükm olunup bi’t-taleb kayd-ı sicil olundu. Tahrîren fî evâhiri şehri Cemâziyelâhir sene 971.
Şuhûdü’l-hâl: Hamza b. Yusuf, Pîrdede b. Ahmed, Hüseyin b. Hasan, Sefer b. Mehmed, Ali b. Hasan ve Alagöz b. Abdullah ve gayruhum
|