|
Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 334 Hüküm no: 720 Orijinal metin no: [65a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Bey b. Abdullah’ın, Kosta v. Todora’dan ödünçten alacaklı olduğu
Vech-i tahrîr-i sicil oldur ki Nefs-i Üsküdar’dan Ali Bey b. Abdullah nâm kimesne karye-i Çengel’den Kosta v. Todora nâm zimmîyi meclis-i şer‘a ihzâr edip takrîr-i da‘vâ kılıp eyitdi ki, mezbûr Kosta nâm zimmîye iki bin akçe verdim taleb ederim dedikde, mezbûr Kosta bi’l-mukābele ikrâr ve i‘tirâf edip dedi ki, mezbûr Ali Bey’e iki bin akçe deynim vardır deyicek mezkûr Ali Bey talebiyle kayd-ı sicil olundu. Tahrîren fî evâili Recebi’l-mürecceb sene ihdâ ve seb‘îne ve tis‘a-mi’e.
Şuhûdü’l-hâl: Alagöz Bey b. Abdullah, Mehmed Çelebi b. Hasan, Mustafa Kaymagî Derkenar: Muhzır Ali’ye havâleye verildi
|