Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 373 Hüküm no: 840 Orijinal metin no: [77a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vezir Ferhad Paşa’nın kölesi Ferhad’ın ölümünün araştırılması Vech-i tahrîr-i sicil oldur ki Vezîr-i mufahhar Ferhad Paşa -yesserallâhu mâ yeşâ- hazretlerinin bâb-ı sa‘âdetleri kapıcılarından Halil Bölükbaşı b. Mustafa meclis-i şer‘a Mahmiye-i Üsküdar’a tâbi‘ merhûm ve magfûrun leh Abdullah Ağa Evkāfı’ndan bağlarına tâbi‘ Rumeli’den gelen Kara Manol nâm zimmî bağında müşârunileyh sâhib-i sa‘âdet hazretlerinin Ferhad nâm bir kulu mecrûhen maktûl bulunmuş ahvâli keşf olup görülmesin taleb ederim dedikde, Müslümanlardan cem‘-i kesîr ile üzerine varıp zikr olan mevzi‘de yolun üzerinde mezbûrun sol çenesinde eser-i cerâhati keyfiyet-i ahvâl suâl olundukda Behram b. Abdullah bağda iken yatsı zamânında Üsküdar’dan Yusuf b. Abdullah nâm kul feryâd ederek beni iki kimesne öldürmek kasdın edip ellerinden güçle halâs oldum dedi ondan gayrı nesne görmedik dedikde, mesfûr Yusuf meclis-i şer‘a getirip ona dahi suâl olundukda meyyit-i mezbûr Mahmiye-i mesfûrda sâbıkan defâ‘atle gelip beni ayartıp ben dahi râzı olup gece ile vardıkda zikr olan mevzi‘de buluşmasında kavl ve karâr edip gece ile vardıkda meyyit-i mezbûr ile bir frenk kâfiri kul [kul] ile dahi benden mukaddem mahall-i mesfûra gelirken beni anlar karşılayıp çabuk hâzırdır gidelim deyip yanıma geldiklerinde o Frenk kâfiri beni başıma değnek ile vurup beni düşürüp mezbûr Ferhad bıçağını çıkarıp beni boğazlamak diledikde ben dahi bıçağını elinden alıp elim kesip ve başımda ve boynumda yaralayıp güçle ellerinden kaçıp mezbûr Behram’a gelip kurtuldum deyip ve mahall-i hâdise [de] bir nacak ve bir bıçak ve bir futa ile bir mikdâr kuru üzüm ve bir çalma eskisi bulunup zikr olan çalmada ve nacak ve kuru üzüm benimdir ve bir bıçak onlarındır birisinin elinden aldım kaçarken onlar birbiriyle çekişir kaldılar eline bıçak gerisin şimden sonra biz onu öldüremeziz dediler deyip ve ol frenk kâfiri tetebbu‘ olundukda hâlâ bulunmayıp mâ hüve’l-vâkı‘ gıbbe’t-taleb kayd-ı sicil olundu. Tahrîren fî 15 şehri Şa‘bâni’l-mu‘azzam sene 971. Şuhûdü’l-hâl: Mehmed Çelebi b. Ahmed ve Mehmed b. Abdullah ve Mehmed Çelebi b. Ahmed Çelebi, Ali b. Mehmed, Nasuh b. Abdullah, İlyas b. Abdullah, Behram b. Abdullah