Üsküdar Mahkemesi 26 Numaralı Sicil (H. 970-971 / M. 1562-1563) cilt: 7, sayfa: 386 Hüküm no: 876 Orijinal metin no: [81a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri Hatun bt. Abdullah’ın yerini Selime Hatun’a satttığı Vech-i tahrîr-i sicil oldur ki Salacak mahallesinden Mihri Hâtun bt. Abdullah cânibinden Mustafa b. Ahmed ve Nesîmi b. Lütfi Çelebi şehâdetleriyle vekâletleri sâbit olan Hüseyin b. Mustafa nâm kimesne meclis-i şer‘-i şerîfe hâzır olup ikrâr ve i‘tirâf kılıp eyitdi ki, bir cânibi Paşmakcı Kurt Hâtun mülküne ve bir cânibi Hüseyin b. Nalband Ali mülküne ve bir cânibi Mustafa b. Ahmed mülküne ve bir cânibi tarîk-ı âmla mahdûd olan mülk yerimi içinde olan eşcâr-ı müsmiresi ve gayrı müsmiresiyle işbu hâmilü’l-hurûf Selime Hâtun bt. ( ) nâm kimesneye elli dört râyicü’l-vakt sikke altına bey‘ edip teslîm-i mebî‘ eyledim deyicek müşteriye-i mezbûrenin vekîli olan Mehmed b. Abdullah bâyi‘a-i mezkûrenin vekîlini ikrâr-ı meşrûhunda bi’l-mukābil tasdîk ve tahkīk edip vukû‘ı üzere temessük taleb eylediği ecilden bu vesîka ber sebîl-i temessük ketb olunup yedine vaz‘ olundu ki vakt-i hâcetde ve mahall-i ihtiyâçda arzedip ihticâc edine. Cerâ zâlik ve hurrire fî evâili Şa‘bâni’l-mu‘azzam sene 971. Şuhûdü’l-hâl: Nesîmi b. Lütfi Halîfe, Alagöz b. Abdullah, Ahmed b. Sinan, Yusuf b. Ahmed, Veli Halîfe [b.] İbrahim, Ahmed b. Nalband Ali, Mustafa b. Sefer, Ali b. Mustafa