Üsküdar Mahkemesi 51 numaları sicil (H. 987-988/ M. 1579-1580) cilt: 8, sayfa: 148 Hüküm no: 218 Orijinal metin no: [26b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Halife b. Musa’nın, eşya ve kitaplarının Çingene Hacı tarafından çalındığı Oldur ki Şaban Halîfe b. Musa meclis-i şer‘- i şerîfe hâzır olup bundan akdem İstanbul’a gelir iken Pendik nâm karyede konduğumuz ahırın duvarı delinip bir harâr ve içinde nısf-ı evvel kelâm-ı şerîf ve bir kıt‘a en‘âm-ı şerîf ve iki ve yirmi cild kitâb [ve] ferâce ve iki kutnî kaftan ve dört tülbent ve dört çift don ve gömlek ve iki eğin Bağdâdî kutnî ve bir kırmızı muhattem kuşak ve bir Haleb kuşağı ve bir bogasi zıbın ve iki velense ve bir mor çuka şalvar ve bir tas ve iki kart kaymak bu cümle esbâbım sirkat olunmuş idi hâlâ Üsküdar’da mahalle-i Ma‘mûre’de sâkin Hacı nâm çingenenin evindedir dedikde ba‘zı müslümanlar irsâl olunup mezkûr Hacı’nın evi yoklandıkda fi’l-vâki‘ nısf-ı evvel kelâm-ı şer[îf] ve bir kıt‘a en‘âm-ı şerîf bulunup kasaba-i Karapınar’dan Sefer b. Abdullah ve Ankara’dan Süleyman b. Hasan nâm kimesneler meclis-i şer‘a hâzırân olup zikr olunan nısf-ı evvel kelâm-ı şerîf ve en‘âm-ı şerîf mezbûr Şaban Halîfe’nin mülküdür deyû haber verdikle[rin]den sonra mezbûr nısf-ı evvel merkūm Şaban’ın elinde olan nısf-ı sânîye tatbîk olundukda kıt‘ada ve hatda ve tezhîbde mutâbık ve muvâfık olıcak mâ cerâ bi’t-taleb kayd olundu. Tahrîren fî evâili Zilhicce sene seb‘a ve semânîn ve tis‘a mi’e. Şuhûdü’l-hâl: Mehmed b. Behrâm, Eyyûb Halîfe b. Hızır, Şucâ‘ b. Karaca