Üsküdar Mahkemesi 56 Numaralı Sicil (H.990-991/M. 1582-1583) cilt: 9, sayfa: 189 Hüküm no: 390 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârissiz ölen Esma’ya ait mülkün müteveffânın sağlığında iken satıldığı, mîrîye âidiyetinin gerekmediği Oldur ki Mahalle-i Ma‘mûre zâbiti olup ve vâki‘ olan beytü’l-mâli Vâlide Sultân -dâmet ismetuhâ- hazretlerinin İmâret-i âmireleri evkāfının mütevellîsi Bâli Bey -dâme mecduhû- tarafından vekâleten zabt eden Ahmed Subaşı b. Mustafa mahfil-i şer‘-i şerîfde bâ‘isü’s-sicil sadrü’s-sulehâ Pîr Veli Efendi b. Karagöz mahzarında takrîr-i kelâm edip bundan akdem mahalle-i mezbûre sâkinlerinden iken fevt olup vâris-i ma‘rûfu olmayıp metrûkâtı mîrîye âid olan Esmâ ( ) nâm hâtunun muhallefâtından olan bir cânibi mesfûr Pîr Veli Efendi mülküyle ve bir cânibi Kasım b. Abdullah mülküyle ve tarafeyni tarîk-i âm ile mahdûd mülk menziline hâlâ müşârün-ileyh Pîr Veli Efendi mutasarrıfdır mîrî için taleb ederin dedikde, gıbbe’s-suâl müdde‘â aleyh mezbûr cevâb verip fi’l-vâki‘ zikr olunan hudûd ile mahdûd olan mülk mezbûre Esmâ’nın mülkü idi. Lâkin hâl-i hayâtında ve kemâl-i sıhhatinde iken mezbûreden üç bin iki yüz râyic fi’l-vakt akçeye iştirâ edip fe emmâ mahkeme-i şerîfede alâ vukû‘ihî tescîl edip elime hüccet-i şer‘iyye almamışımdır. Hakīkat-i hâle vâkıf nice müslümanlar vardır mülk-i müşterâmdır dedikde akībü’l-istişhâd Hacı Mahmud b. Mehmed ed-Dellâk ve Pîr Ahmed b. Murad el-Cündî hâzırân olup edâ-i şehâdet-i şer‘iyye edip müdde‘î-i mezbûrun da‘vâ ve taleb eylediği menzili müdde‘â aleyh merkūm müteveffât-ı mezbûre Esmâ’dan hâl-i hayâtında takrîri üzre üç bin iki yüz akçeye iştirâ edip bizim yanımızda semenini add ü teslîm edip ve hâne-i merkūmu mezbûreden kabz edip husûs-ı merkūma bizi işhâd eylediler menzil-i mesfûr Pîr Veli Efendi’nin mülk-i müşterâsı olduğuna şâhidleriz ve şehâdet dahi ederiz dediklerinde, ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ olup menzil-i merkūm kemâ-kân fi’l-evvel yed-i müdde‘â aleyhde ibkā olunup mülkiyetine hükm-i birle mâ vaka‘a bi’t-taleb kayd olundu. Tahrîren fî evâsıtı Ramazâni’l-mübârek sene 991. Şuhûdü’l-hâl: Mehmed b. Kasım, Hacı Kerimüddin (Mehmed) et-Tâcir, Kadri Çelebi b. Hızır et-Tâcir, Ömer b. et-Tâcir, Mustafa b. Memi.