Üsküdar Mahkemesi 56 Numaralı Sicil (H.990-991/M. 1582-1583) cilt: 9, sayfa: 194 Hüküm no: 403 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır b. Nebi, Hacı Seydî Ali b. Hızır’a olan borcuna karşılık bağını takas ettiği Oldur ki Vilâyet-i Karaman’da Gaferiyât kazâsına tâbi‘ Arayin nâm karye sâkinlerinden Hızır b. Nebi mahfil-i kazâda bâ‘isü’s-sicil nefs-i Gaferiyât’tan Hacı Seydî Ali b. Hızır mahzarında takrîr-i kelâm edip bundan akdem mezkûr Hacı Seydî Ali’ye emti‘a-i mütenevvi‘a bahâsından ve karzdan bin beş yüz akçe lâzımü’l-edâ ve vâcibü’l-kazâ deynim olup hâlâ yine kazâ-i mezbûr muzâfâtından Kışla nâm karyede vâki‘ bir cânibi Hâce Sinan bağıyla ve bir cânibi Yayla nâm kimesne bağıyla ve Mehmed bağıyla ve bir tarafı tarîk-i âm ile mahdûd tahmînen bir dönüm mikdârı mülk bağımı meblağ-ı merkūm deynim bin beş yüz akçe mukābelesinde mezkûr Hacı Seydî Ali’ye bi tarîki’t-takâs bey‘-i bât ile bey‘ edip teslîm-i semen kılıp mezkûr dahi vech-i meşrûh üzre iştirâ ve ahz ü kabz eyledi min ba‘d mülk-i müşterâsıdır nice dilerse mutasarrıf ola dedikde mukarrun-lehü’l-mezbûr mukırr-ı mezkûru ikrâr-ı sahîhinde vicâhen ve şifâhen tasdîk edip sıhhat-i bey‘e hükm-i birle mâ vaka‘a bi’t-taleb kayd-ı sicil olundu. Tahrîren fî târihi mezbûr. Şuhûdü’l-hâl: Sadrü’s-sulehâ Pîr Veli Efendi, Hacı Kerim b. Hacı Sinan, Osman Çelebi b. Hacı Ömer, Musa Çelebi b. Pîr Mehmed, Pîr Ahmed b. Murad