Üsküdar Mahkemesi 56 Numaralı Sicil (H.990-991/M. 1582-1583) cilt: 9, sayfa: 195 Hüküm no: 405 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ı Kara Süleyman’ın bıçakla yaraladığı Oldur ki Mahalle-i Ma‘mûre zâbiti Ahmed Subaşı mahfil-i kazâya hâzır olup mahrûse-i İstanbul’da sâkin Mustafa nâm topçunun abd-i me’zûnu olup dükkânında ticâret üzre olan Süleyman b. Abdullah nâm kimesneyi ihzâr ve muvâcehesinde takrîr-i kelâm edip kâtib Mehmed Çelebi’nin gulâmı Ali nâm Arab’ı harmanlar kurbunda mecrûh bulunup seni kim vurdu dediğimizde Kara Süleyman vurdu deyû cevâb eylemiş idi lâkin vuranı teşhîs etmeyip mezbûr Süleyman vurmuş suâl olunsun dedikde gıbbe’s-suâl inkâr ile cevâb verip akībü’l-istişhâd topçular kethüdâsı Hasan Bey ve Seydî b. Mahmud hâzırân olup şehâdet-i şer‘iyye edip akşama karîb ol cânibe yere çıkıp bir kavga görüp nedir aslı deyip yakın vardığımızda mezbûr Süleyman b. Abdullah fi’l-hâl yanından bıçağın çıkarıp mezbûr Arab’ı sol pazusuna vurup dahi yalın bıçağıyla firâr eylediğinde ardından mezbûru kovup tutamadık kaziyye böyle olmuşdur dediklerinde mâ vaka‘a bi’t-taleb kayd olundu. Tahrîren fî evâili Şevvâli’l-mükerrem sene 991 Şuhûdü’l-hâl: Mustafa b. Bilâl, Mehmed b. Abdullah, Mehmed b. Hasan, Mahmud b. Mehmed, Usta Mehmed el-Hayyât