Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 96 Hüküm no: 8 Orijinal metin no: [2a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakomi v. Yorgi’nin kaybolan kiralık kayığın ücretini Yani v. Mihal’e ödenmesi Mahrûse-i Üsküdar’a tâbi‘ Çengel nâm karyeden Yani v. Mihal meclis-i şer‘de Yakomi v. Yorgi mahzarında da‘vâ ve takrîr-i kelâm edip iki bin akçe kıymetli on iki zirâ‘ bir kayığımı mezbûr Yakomi’ye icâre ile verip mezbûr Yakomi isti‘mâl eylerken bir gün öğlen ezanı zamânında mezkûr kayığı mahmiye-i Galata’da Balıkpazarı İskelesi’nde bağlayıp kendinin ba‘zı kimesnede olan deynin almak için gidip öğleden ikindiye dek eğlenip gelip yerinde kayığı bulmayıp zâyi‘ olmuş kıymetin tazmîn taleb ederim ve bir def‘a mezbûr Yakomi mahmiye-i mezbûrede nâ’ibü’ş-şer‘ olan Mevlânâ Yusuf b. İlyas huzûrunda husûmet edip mezbûrun vech-i meşrûh üzre merkūm kayığı bağlayıp kendi maslahatına öğleden ikindiye dek gittiğine mezbûr Yakomi’nin ikrâr eylemesi ile ehl-i hibreden Şaban Reis b. Mehmed nâm kimesne ve Kiryako v. Pireşkova nâm zimmînin bu kadar zamân eğlenmiş taksîrdir deyu şehâdet etmeleri ile mezbûr kayığın bahâsı olan iki bin akçeyi hükm ettirdim deyip ve mevlânâ-yı mezbûrun imzâsı ve mührü ile hüccetin ibrâz edip mazmûn-ı takrîrine muvâfık bulunup mezbûr Yakomi’nin bu kadar zamân kayığı mezbûr iskelede bağlayıp kendi maslahatında eğlendiğine mezbûr Yakomi ikrâr eylediği ve zikr olunan ehl-i hibrelerin mezbûr bu kadar zamân eğlenmesi taksîrdir deyu şehâdet eylediklerinde mezbûr kayığın bahâsıçün iki bin akçeye hükm olunduğu mezbûr hüccetin içinde münderic olup ve mazmûn-ı mezbûra muvâfık Toma v. Kosta ve Yorgi v. Panayot nâm zimmîler dahi mâ-cerâ mevlânâ-yı mezbûr huzûrunda böyle olmuşdur şehâdet ederiz dediklerinden sonra mezbûr Yakomi’ye mezbûr kayığın bahâsın ödemek lâzım gelip lâkin mezbûr kayığın bahâsı iki bin akçe eder ve yine beyyine lâzım olmağın beyyine taleb olundukda geri mazmûn-ı hüccete şehâdet eden mezbûrân Toma v. Kosta ve Yorgi v. Panayot mezbûr kayığı biz biliriz iki bin akçe eder idi şehâdet ederiz dediklerinde ba‘de ri‘âyet-i şerâiti’l-kabûl şehâdetleri makbûle olup mezbûr Yakomi’den mezbûr Yani’ye merkūm kayığın bahâsı iki bin akçe tazmîn olunup hükm olunduğu ketb u tahrîr olundu. Hurrire fî evâili Rebî‘ilâhir sene elf. Şuhûdü’l-hâl: Mehmed b. Behrâm, İlyas b. Abdullah el-cündî, Kâtibü’l-hurûf Mustafa, Muttalib b. Süleyman, Mehmed b. Behrâm, Mustafa b. Mehmed, Receb b. Behrâm