Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 98 Hüküm no: 12 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Oturduğu evin Kasım b. Hasan’ın mülkü olduğu Oldur ki Üsküdar subaşısı olan Müstedâm Bey meclis-i şer‘-i şerîfde Kasım b. Hasan nâm topçu mahzarında da‘vâ kılıp Kefçe mahallesinde sâkin olduğu menzil ki bir cânibi tarîk-i âm ve bir cânibi Bozacı Yusuf evi ve bir cânibi dahi Kasım Bozacı yeri ve bir cânibi Hurşid nâm câriye ve Hüdaverdi ve Pervâne nâm kimesnelerin evleri ile mahdûddur mezbûr topçunun hâtunu Fâtıma’nındır fevt olup nısfı mezbûr Kasım ve nısf-ı âharı beytülmâla âid olup beytülmâl için taleb ederim deyip mezbûr topçuya suâl olundukda menzil-i mezbûr kendi mülkümdür yerini Âlem Sultan bt. Mehmed nâm avretten satın aldım ba‘dehû üzerine ev yaptım deyip cevâb verip ve Mehmed b. Abdullah ve Ali b. Abdullah nâm Müslümanlar dahi mezbûr topçunun takrîrine muvâfık şehâdet edip mezbûr Müstedâm Bey’in da‘vâsına mutâbık şehâdet eder kimesne olmayıp ve mezbûr topçu hâtunun mezbûre Fâtıma’nın aslâ menzil-i mezbûrda hakkı ve dahl-i yokdur deyu yemîn billâh eylemeğin menzil-i mezbûr merkūm topçu bey yedinde ibkā olunup mâ vaka‘a bi’t-taleb sicil olundu. Tahrîren fi’l-yevmi’l-hâdî aşer min şehri Rebî‘ilâhir li sene elf Şuhûdü’l-hâl: Hasan b. Abdullah, Hasan b. Nurullah, Mehmed b. Abdullah, Yusuf b. Abdullah, Mehmed Bey b. Abdullah, Ahmed b. Abdullah ve gayruhüm