Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 103 Hüküm no: 24 Orijinal metin no: [3b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Memi’nin ölen oğlunun mirasından hissesini aldığı Oldur ki Mahrûse-i Üsküdar’da Solak Sinan mahallesi sâkinlerinden Emine bt. Memi nâm hâtun meclis-i şer‘de yine kendi oğlu oğulları Mahmud ve Mehmed ibneyn el-merhûm Ahmed nâm kebîrler ve Ayşe ve Mustafa b. Ahmed el-mezbûr sagīr ve sagīrelerine babalarından irs-i şer‘le intikāl iden hisse-i şer‘iyyesine vasî olup merhûm-ı mezbûrun zevcesi olan Zeyni bt. Şah Mahmud nâm kimesneler mahzarlarında ikrâr ve takrîr-i merâm [edip] müteveffâ-yı mezbûr oğlum Ahmed’den bana irs-i şer‘le intikāl eden bin beş yüz akçe hisse-i şer‘iyyemi bi’t-tamâm alıp kabûl ve kabz edip merkūmûnun zimmetlerini da‘vâ-yı mîrasdan ibrâ’ ve ıskāt eyledim dedikde mukırr-ı mezbûrenin vech-i meşrûh üzre vâki‘ olan ikrârını mukarrun lehümü’l-merkūmûn bi’l-muvâcehe ve’l-müşâfehe tasdîk ve tahkīk ve kabûl eyledikden sonra bu hurûf ketb olunup mâ vaka‘a kayd olundu. Tahrîren fî evâsıtı Rebî‘ilâhir li sene elf. Şuhûdü’l-hâl: Mustafa Çelebi b. Sinan, Nalband Veli b. Abdullah, Mustafa b. Müstecib, Hacı Mustafa b. Nalband Mehmed b. Hacı Mustafa el-mezbûr ve gayruhüm