Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 107 Hüküm no: 33 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ali ile Mehmed Ali b. Behrâm arasındaki alacak verecek anlaşmazlığı Oldur ki Sadrazam hazretleri âdemlerinden Mehmed Bey b. Ali nâm kimesne mahfil-i şer‘de yine merkūm paşa hazretleri âdemlerinden olup arpa kâtibi olan Mehmed Ali b. Behrâm nâm kimesne mahzarında ikrâr ve takrîr-i merâm kılıp mezbûr Mehmed Çelebi’ye iki kıt‘a Kelâm-ı Şerîf verdim elli sekiz bin akçeye hâlâ yirmi sekiz bini hâlâ nakid olup bâkī otuz bin akçe kendi zimmetlerinde kaldı hâlâ lâzımü’l-edâ vâcibü’l-kazâ deynidir dedikde mukırr-ı mezbûrun vech-i meşrûh üzre vâki‘ olan ikrârı mukarrun lehü’l-merkūm bi’l-muvâcehe tasdîk ve tahkīk eylediği bi’t-taleb kayd olundu. Fi’t-târihi’l-mezbûr. Şuhûdü’l-hâl: Hasan Çavuş Mirmîrân-ı Haleb, Mustafa Bey Reis-i Bevvâbân-ı mirmîrân-ı mezbûr, İlyas Bey Ser ulûfeciyân, Şaban Çelebi Kâtib-i sadrazam, Bayezid Bey Müteferrika-i Sadrazam, Hüseyin Kethüdâ-i defter-i …? ….?, el-Hâc Mustafa Halîfe-i kilâr-ı sadrazam, Mehmed Çelebi Kâtib-i defter-i mirmîrân-ı Haleb, Mehmed b. Behrâm el-muhzır, Cafer Bey mirâhor-ı mirmîrân-ı Haleb ve Muttalib el-muhzır