Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 110 Hüküm no: 38 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Receb’in eşi ve çocuklarına kalan evin Yahya Bey b. Abdullah’a satıldığı “Oldur ki Kefçe mahallesinden müteveffâ Receb’in Meryem nâm kızının vekîli Mehmed nâm sagīr oğlunun” Oldur ki Kefçe mahallesinden müteveffâ Receb’in, Meryem nâm kızı tarafından Ahmed nâm sagīr oğlunun vasîsi olan Hatice tarafından husûs-ı âtîye vekâleti şer‘le Ali Bey b. Abdullah nâm sipâhi ve Osman b. Mahmud nâm yeniçeri şehâdetleri ile sâbit olan mezbûre Hatice’nin güveyisi Ali b. Mehmed meclis-i şer‘-i şerîfde hâmilü’l-kitâb hâssa korucubaşı olan Yahya Bey b. Abdullah nâm kimesne mahzarında tav‘an ikrâr ve i‘tirâf edip mahalle-i mezbûrede bir cânibi Kapıcı Behrâm Bey ve bir cânibi Yahya Bey ve bir cânibi Arab sâkin olduğu evler hudûdu ile mahdûd olan menzil ki beş ocaklı evleri müştemildir zikr olunan menzil Şâtır Dilsiz’den oğlu Mustafa’ya ve Mustafa’dan li üm er karındaşı olan mezbûr Mehmed’e ve kız karındaşı mezbûre Meryem’e ve vâlidesi mezbûre Hatice’ye intikāl edip hâlâ ziyâde harâb olup ta‘mîre dahi kudretleri olmayıp sâir evleri ta‘mîr etmek için içlerinden mezbûr Yahya Bey ahırına muttasıl olan evi mezbûr Yahya Bey beş bin akçeye bey‘-i bât ile bey‘ edip teslîm-i mebî‘ ve kabz-ı semen eyledim dedikde mukırr-ı mezkûru mukarrun lehü’l-mezbûr bi’l-muvâcehe tasdîk edip mâ vaka‘a bi’t-taleb sicil olundu. Fî evâsıtı Rebî‘ilâhir sene elf. Şuhûdü’l-hâl: Süleyman b. Hızır, Hasan b. Abdullah, Ali Bey b. Abdullah, İlyas Bey b. Abdullah, Yusuf b. Mahmud, el-Hâc Hasan b. Abdullah, Osman b. Mahmud