Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 111 Hüküm no: 40 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Trabzon, Çıldır, Kars ve Erzurum Beylerbeyiliği’ndeki müjde bahâsının iltizâma verilmesi Erzurum Beylerbeyiliği’nden Kemek? nâm karye sâkinlerinden olup erbâb-ı zu‘âmetden olan Kasım Çavuş Bey b. Molla Murad demekle ma‘rûf kimesne fahrü’l-emâcid ve’l-ekârim bi’l-fi‘l çakırbaşı olan İbrahim Ağa hazretleri tarafından ikrârını tasdîke vekîl-i şer‘îleri olan Ali Bey b. Hızır Bey nâm kimesne mahzarında ikrâr edip Trabzon ve Çıldır ve Kars ve Erzurum Beylerbeyiliği’nde vâki‘ müjde bahâsını bin senesi Saferi’nin ibtidâsından üç sene tamâmına beher sene ellişer bin akçeye üç yılda yüz elli bin akçe olur ve dahi sene-i mezbûrede üç cenah şâhin ve ispirî ve balaban ve sayfî? vermek şartıyla iltizâm ve kabûl eyledim her senenin kıstü’l-yevmini akrabâm ve kefîl bi’l-mâlım olan hâssa doğancılardan İlyas Bey’e teslîm edicek oldum ve’l-hâsıl kadîmü’l-eyyâmdan olıgelen âdet üzre beher senenin kıstü’l-yevmini teslîm eylemezden sene-i uhrâya dâhil eylememek üzre ve mûmâileyh havâle ettiklerinin ve Üsküdar’a tâbi‘ Kuzguncuk nâm karyede sâkin Yaralı v. Sarhoş nâm mültezim-i mezbûra biz kefîl olduk deyip dediklerinde mukırrûn-ı mezbûrunun vech-i meşrûh üzre vâki‘ ikrârını mukarrun lehü’l-merkūm bi’l-muvâcehe tasdîk eylediği kayd olundu. Tahrîren fî evâsıtı Rebî‘ülevvel sene elf. Şuhûdü’l-hâl: Sinan Subaşı el-cündî, eş-Şeyh Maksud b. Arabî, Mehmed b. Behrâm, Behrâm Subaşı, Ahmed Bey el-bevvâb