Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 119 Hüküm no: 59 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Trabzon, Çıldır, Kars ve Erzurum Beylerbeyiliği’ndeki müjde bahâsının iltizâma verilmesi Erzurum Beylerbeyiliği’nden Kemek? nâm karye sâkinlerinden olup erbâb-ı ze‘âmetinden olan Kasım Çavuş b. Molla Murad demekle ma‘rûf kimesne fahrü’l-emâcid ve’l-ekârim bi’l-fi‘l Çakırcıbaşı İbrahim Ağa hazretleri tarafından ikrâr-ı âti’z-zikri tasdîka nehc-i şer‘î üzre vekâleti sâbite olan Ali Bey b. Abdullah mahzarında ikrâr edip Trabzon ve Çıldır ve Kars ve Erzurum beylerbeyiliklerinde vâki‘ müjde bahâsını bin Saferi’nin ibtidâsından iki sene tamâmına beher sene ellişer bin akçeye iki yıldan yüz bin akçe olur ve dahi sene-i mezbûrede on cenah şâhin, ispir ve balaban ve sayfî? vermek şartıyla iltizâm ve kabûl eyledim her senenin kıstü’l-yevmini ve havâlem ve dahi kefîl bi’l-mâlım olan hâssa doğancılarından İlyas Bey’e teslîm eylemeden sene-i âharı dahl eylememek üzre deyip ve mûmâileyh havâle İlyas Bey ve Üsküdar’a tâbi‘ Kuzguncuk nâm karyeden Yaralı v. Sarhoş nâm zimmî mültezim-i mezbûrun zarar-ı mâlına biz kefîl olduk eğer mültezim gelmeyip firâr ederse emlâk ve esbâbımız füruht olunup mîrî akçe tahsîl oluna dediklerinde mukırrûn-ı mezbûrunun vech-i meşrûh üzre vâki‘ olan ikrârlarını mukarran lehü’l-merkūm bi’l-muvâcehe tasdîk ve’l-müşâfehe tahkīk olunduğu kayd olundu. Tahrîren fî evâsıtı Rebî‘ilâhir li sene elf. Şuhûdü’l-hâl: Ali Subaşı el-cündî, eş-Şeyh Maksud, Mehmed b. Behrâm, Muttalib b. Süleyman, Ahmed Bey b. Abdullah el-bevvâb Yevmü’s-sülesâ 27 Rebî‘ilâhir li sene elf