Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 124 Hüküm no: 70 Orijinal metin no: [8a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Hâtun ile Aynî bt. Ali’nin alacak davasında sulh olduğu Üsküdar’da mahalle-i Ma‘mûre’de sâkine olan Şerife Hâtun bt. Mustafa tarafından ikrâr-ı âtîye vekîl olan İbrahim b. Abdullah nâm kimesne meclis-i şer‘-i şerîfde Aynî bt. Ali nâm avret mahzarında ikrâr-ı tav‘î kılıp mezbûre müvekkilem mezbûre Aynî ile evimden esbâbım aldın deyu nizâ‘ ve da‘vâ edip âkıbet mâ-beynlerin Müslümanlar bin sekiz yüz akçeye ıslâh edip müvekkilem dahi bin sekiz yüz akçeyi mezbûre Aynî’den alıp zimmetini da‘vâ-yı mezbûreden ibrâ’ edip var ibrâmızı bizim tarafımızdan ikrâr edip mezbûre Aynî’ye hüccet ver dedi dediğinde mezbûre Aynî mukırr-ı mezkûru cemî‘ kelimâtında ve ikrârında tasdîk eyledikden sonra meblağ-ı mezbûru mezbûre Aynî’nin zevci Budak b. Nâzır nâm kimesneye verilmeğin ol dahi ben mezbûre Şerife yedinden aldım zimmetimdedir deyu ikrâr etmeğin mâ vaka‘a bi’t-taleb sicil olundu. Tahrîren fî evâsıtı Rebî‘ilâhir li sene elf. Şuhûdü’l-hâl: Mustafa Çelebi el-kâtib, Ahmed b. Mustafa Çavuş, Ramazan Bey b. İbrahim, el-Hâc İbrahim, Maksud b. Hacı Nebi, Sinan b. Abdi ve gayruhüm