Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 126 Hüküm no: 77 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan Bey’in, Ahmed Ağa Vakfı’na olan borcuna karşılık evini rehin verdiği Oldur ki Hâlâ Hersek sancağı beyi olan kıdvetü’l-ümerâi’l-kirâm Rıdvan Bey cânib-i şerîflerinde ikrâr-ı âti’l-vekâlete vekîl olup vekâleti Osman Bey b. Abdurrahman ve İbrahim b. Abdullah nâm Müslümanlar şehâdetleri ile sâbite olan Dergâh-ı âlî çavuşlarından Bekir Çavuş b. Abdullah mahfil-i şer‘de hâlâ mahmiye-i Kostantıniyye’de medfûn olup ve Hersek sancağında Dârü’l-hadîs ve Dârü’l-kurrâsı olan merhûm Ahmed Ağa nâm müteveffânın evkāfına mütevellîsi olan fahrü’l-emâsil ve’l-akrân Mustafa Yeniçeri b. Oruç mahzarında tav‘an ikrâr ve i‘tirâf edip evkāf-ı mezbûrdan mütevellîsi mezbûr Mustafa Yeniçeri yedinden müvekkilim mûmâileyh Rıdvan Bey nakd râyicü’l-vakt yüz elli bin akçe alıp yüz binine mahrûse-i Üsküdar’da Mirahor mahallesinde bir cânibi tarîk-i âm ve bir cânibi merhûm Hoca Paşa evleri ve bir cânibi Subaşıoğlu evleri ve bir cânibi Cemşid Kethüdâ evleri ile mahdûd olan mülk evlerini bağçesi ve cemî‘ tevâbi‘i ve levâhıkı ile bana rehin verip tamâm tahliye ve teslîm eyleyip ve elli bin akçesine dahi Dergâh-ı âlî çavuşlarından işbu hâzır bi’l-meclis olan Yusuf Çavuş b. Mehmed’i kefîl verdi deyicek mukırr-ı mezkûru mezbûr mütevellî vicâhen tasdîk edip ve mezbûr Yusuf Çavuş dahi elli bin kefâletle mukır olup mâ vaka‘a bi’t-taleb sicil olundu. Fî evâsıtı Rebî‘ilâhir sene elf. Şuhûdü’l-hâl: Ferhad Ağa b. Abdullah Yayabaşı, Ahmed Efendi el-müftü, Mehmed Çelebi el-müstaid, Karagöz Beşe [b.] Ömer, Sipâhi Hüseyin Bey ve gayruhüm