Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 130 Hüküm no: 89 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Yakub’dan, Ahmed Paşa Vakfı’na ait hanın kirasının tahsil edildiği Mahrûse-i Üsküdar’da medfûn merhûm el-Hâc Ahmed Paşa evkāfına kāimmakām-ı mütevellî olan Abdişah b. Abdullah mahfil-i kazâda merhûm mûmâileyh evkāfından olup mahmiye-i Kostantıniyye’de vâki‘ Fîruz Ağa mahallesinde olan hânın müste’ciri Mehmed b. Yakub mahzarında da‘vâ ve takrîr-i merâm edip hân-ı mezbûrun ücretinden on beş aylık kirâ bâkī kalıp taleb ettiğimde ücretden zimmetimde bâkī kalmadı on beş aylık kirâyı sana cümlesin teslîm eyledim mühürlü tezkirem vardır deyu şer‘le hesâb olunup görülmesin taleb ederim deyicek merkūm Mehmed mühürlü tezkirelerini ibrâz edip evvelâ zikr olunan on beş aylık kirâ hesâb olunup her aylığı dört bin yüz altmış sekiz akçe hesâbı üzre on beş aylık kirâ cem‘an altmış iki bin dört yüz yirmi akçe olup meblağ-ı merkūmdan mühürlü tezkiresi mûcebince kırk beş bin sekiz yüz kırk sekiz akçe mütevellî-yi merkūma teslîm edip ol dahi tesellümüne ikrâr edip meblağ-ı mezbûr altmış iki bin dört yüz yirmi akçenin kırk beş bin sekiz yüz kırk sekiz akçesi mütevellî-yi mezbûra teslîm olıcak on altı bin beş yüz yetmiş iki akçe bâkī kalıp bâkī kalan meblağa cevâbın nedir deyu suâl olundukda cevâb verip artık teslîme mühürlü temessüküm yokdur amma on beş aylık kirâyı cümle teslîm eyledim deyince tenâkuz-ı kelimâtı vâki‘ olıcak meblağ-ı mezbûr on altı bin beş yüz yetmiş iki akçe ba‘de’t-tahlîf vakf-ı mezbûra hükm olunduğu kayd-ı sicil olundu. Hurrire fî evâili Cemâziyelevvel li sene elf seniyyeti mine’l-hicreti’n-nebeviyye. Şuhûdü’l-hâl: Cemşid Ağa, el-Hâc Hüseyin b. Mustafa, Muttalib b. Süleyman, Mehmed b. Behrâm, Hüseyin b. Behrâm