Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 138 Hüküm no: 108 Orijinal metin no: [11a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şah Sultan’ın, Sultan Selîm Hân Vakfı’na borcunu ödediği Dergâh-ı âlî müteferrikalarından olup merhûm Zal Paşa hazretleri’nin zevceleri olan dürre-i iklîli’l-iffet Şah Sultan bt. el-merhûm ve magfûrun-leh es-Sultân Selîm Hân hazretlerinin vakıflarına mütevellî olan fahrü’l-emâsil ve’l-a‘yân Mustafa Kethüdâ mahfil-i şer‘-i şerîfde mahmiye-i Kostantıniyye’de Âşık Paşa mahallesinde sâkine olup ve Dergâh-ı âlî müteferrikalarından fahrü’l-emâcid ve’l-ekârim Erzurum Defterdârı Hüseyin Efendi hazretlerinin zevcesi olan bâ‘isetü’l-kitâb fahrü’l-muhadderât Müstedâm Hâtun bt. Abdullah tarafından ikrâr-ı âtîde tasdîka vekâleti fahrü’l-kuzât Mevlânâ Mustafa Efendi ve zu‘emâdan Ömer Bey b. Cafer nâm kimesneler şehâdetleri ile sâbite olan defterhâne kâtiblerinden Seyfullah Çavuş mahzarında tâyi‘an ikrâr edip evkāf-ı mezbûre mühimmâtı için mukaddemâ mezbûre Müstedâm Hâtun’dan bi‘d-defe‘ât tarîkü’l-karz iki yüz elli bin dokuz yüz elli akçe almış idim hâlâ meblağ-ı mezbûrdan iki yüz bin akçesine duta mahmiye-i mezbûrede Elvanoğlu mahallesinde Mosi Yahudi’den evkāf-ı mezbûre akçesi ile vakıf için alınıp ve inde’l-ahâlî ma‘lûmü’l-hudûd olan evleri cemî‘ tevâbi‘ ve levâhıkı ile ve meblağ-ı mezbûrdan otuz altı bin dokuz [yüz] elli akçesine duta dahi mahmiye-i mezbûrede Âşık Paşa merhûm mahallesinde vâki‘ cevânib-i erba‘ası tarîk-i âm ve Âsûde Hâtun Türbesi ve Yahya Kethüdâ ve Hacı Yusuf nâm kimesneler mülkleri ile mahdûd olup ve evkāf-ı mezbûre akçesiyle vakıf için alınan evi tevâbi‘i ile bey‘-i bât ile bey‘ ve teslîm eyledim on beş bin üç yüz akçesin mezbûre Müstedâm Hâtun’a verdim deyicek mukırr-ı mezbûre cemî‘ kelimâtında mezbûr Seyf[ullah] dahi müvekkilesi mezbûre Müstedâm Hâtun tarafından vekâletin tasdîk eyledikden sonra kayd olundu. Hurrire fî evâsıtı Cemâziyelevvel sene elf. Şuhûdü’l-hâl: Fazlı Çelebi b. Yusuf, Şemseddin b. Solak, Muttalib b. Süleyman, Mehmed b. Behrâm, Mehmed b. Ali el-kâtib