Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 143 Hüküm no: 118 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud b. Mirzâ’nın borçlarına karşılık dükkanının satılması Mahrûse-i Üsküdar hamâha’llâhu ani’l-ekdâr mahallâtından Kefçe mahallesinde bundan akdem fevt olan Mahmud b. Mirzâ’nın eytâm-ı sıgārına kıbel-i şer‘-i şerîfden vasî nasb olunan Ahmed b. Abdullah nâm kimesne mahfil-i kazâda hâmil-i hâze’l-kitâb el-Hâc Hürrem b. Abdullah mahzarında edâ-yı kelâm edip müteveffâ-yı mezbûrun Osman Ağa vakfına dokuz bin akçe ve İsak nâm Yahudi’ye beş bin yüz akçe ve Debbâğ Receb b. Mehmed’e bin yüz yetmiş beş akçe ve Ferhunde Hâtun vakfına iki [bin] akçe ve Ahî Baba nâm debbâğa bin seksen akçe ve Mustafa b. Abdullah’a altı yüz akçe ve Debbâğ Abdülkerim’e bin sekiz yüz on akçe ve Hacı Mahmud’a dokuz yüz seksen akçe cem‘an yirmi bir bin yedi yüz kırk beş deyni sâbit olup menkūlâtdan düyûnuna kifâyet eden nesnesi olmayıp düyûn-ı mezkûra zarûretinden ötürü mahmiye-i Galata’ya tâbi‘ Tophâne’de merhûm Kapudan Ali Paşa’nın vakıf yeri üzerinde vâki‘ yevmî iki buçuk akçe ücret ile tutulur mülk dükkân ki Mehmed b. Yakub ve Yusuf b. Abdullah ve Topçu Mehmed mülkleri ile mahdûddur zikr olunan dükkânın nısfı müteveffâ-yı mezbûr Mahmud’un mülkü olmağın nısf-ı mezbûru evkāf-ı mezbûre mütevellîsi Ahmed ma‘rifetiyle sûk-ı sultânîde nidâ ve bey‘-i men yezîd edip mezbûr el-Hâc Hürrem’in üzerinde dokuz bin akçede karâr etmeğin mezbûr el-Hâc Hürrem’e dokuz bin akçeye bâtten bey‘ ve teslîm ve kabz-ı semen eyledim deyicek mukırr-ı mezbûrun kelâmını mukarrun lehü’l-mezbûr bi’l-muvâcehe tasdîk edip ve mübâya‘a-i mezbûra zarûret-i deynden ötürü olup mütevellî ma‘rifeti ile olduğu muhakkak olmağın ketb olundu. Hurrire fî evâsıtı Cemâziyelevvel sene elf. Şuhûdü’l-hâl: Mehmed b. Behrâm, Hüseyin b. Behrâm, Mehmed b. Habîb, Hasan b. Sâdık, el-Hâc Hüseyin b. Mustafa, sefer b. Abdullah