Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 144 Hüküm no: 120 Orijinal metin no: [12a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud b. Mirzâ’nın borçlarına karşılık dükkanının satıldığı Mahrûse-i Üsküdar mahallâtından Kefçe mahallesinde Mahmud b. Mirzâ nâm müteveffânın Mehmed ve Mustafa nâm sagīr oğullarına ve Ayşe nâm sagīre kızına vasî nasb olunan Ahmed Bey b. Abdullah mahfil-i kazâda el-Hâc Hızır b. Abdullah nâm kimesne mahzarında takrîr-i da‘vâ kılıp merhûm-ı mezbûrun Galata kazâsına tâbi‘ Tophâne’de vâki‘ Mehmed b. Yakub ve Yusuf b. Abdullah nâm yeniçeri ve Mahmud nâm topçu mülkleriyle mahdûd olan dükkânı mezbûr Hacı Hürrem’e do[k]uz bin akçe zarûret-i deyn için satılmışken sekiz bin üç yüz akçeyi nakid alıp dükkân-ı mezbûrun merhûm Kapudan Ali Paşa hazretlerinin evkāfından olmağla mezbûr el-Hâc Hürrem yedi yüz akçe kirâsı az geldi demekle mağrûr edip yedi yüz akçesin dahi vakf-ı mezbûra havâle edip mezbûr el-Hâc Hürrem’e ver demiştir lâkin üç aylık mezbûr el-Hâc Hürrem ancak iki yüz yirmi beş akçe verip mâ‘adâsı zimmetinde kalmış taleb ederim dedikde mezbûr el-Hâc Hürrem’e suâl olundukda yedi yüz akçe az gelmiş kirâyı bî-kusûr vakf-ı mezbûr mütevellîsine verdim deyip kelimâtına muvâfık Mehmed b. Yakub ve Ömer b. Hacı nakd-i sahîha yedi yüz akçe kirâ az gelip mezbûr el-Hâc Hürrem vakf-ı mezbûr mütevellîsine edâ eyledi şehâdet ederiz dediklerinde ba‘de’t-ta‘dîl hayyiz-i kabûlde vâki‘ olup mâ vaka‘a bi’t-taleb kayd olundu. Şuhûdü’l-hâl: Hacı Memi b. Abdullah, Receb b. Dursun, Fazıl b. Mehmed, Ali Çelebi ve Mübâşir Ali Çavuş