Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 147 Hüküm no: 126 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamile Hâtun bt. Ramazan Bey’e ait yerin Mehmed Bey’e satıldığı Nefs-i Üsküdar’da Mehmed Paşa mahallesi sâkinelerinden Kâmile Hâtun bt. Ramazan Bey tarafından ikrâr-ı âti’z-zikre vekâleti Mehmed Reis b. Hüsam ve Aydın Bey b. Abdullah nâm kimesneler şehâdetleri ile sâbite olan Yusuf Bey b. Ali nâm kimesne mahfil-i kazâda işbu hâmilü’l-kitâb Mehmed Bey b. Mustafa ikrâr ve takrîr-i merâm kılıp müvekkilemin mahalle-i mezbûrede vâki‘ Hüsrev Bey b. Abdullah ve Hasan Çelebi b. Abdullah ve müşterî-i mezbûr ve müvekkilem mezbûre Kâmile mülkleri ile mahdûd tahmînen bir evlek yerim mezbûr Mehmed Bey’e iki bin altı yüz nakd râyicü’l-vakt akçeye bey‘ edip kabz-ı semen ve ikbâz-ı müsemmen kıldı dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr bi’l-muvâcehe tasdîk edicek kayd-ı sicil olundu. Hurrire fî evâsıtı Cemâziyelevvel sene elf. Şuhûdü’l-hâl: Mehmed Çelebi, Kasım Bey b. Abdullah, Mustafa Bey b. Abdullah, Mustafa b. Ahmed, Muttalib b. Süleyman, Hasan b. Sâdık el-cündî