Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 156 Hüküm no: 149 Orijinal metin no: [15a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Deniz b. Hüseyin’in ölen kardeşi Budak’ın terekesini subaşıdan teslim aldığı Mahrûse-i Diyarbekir’de Kurşunlu Mescid mahallesi sâkinlerinden Deniz b. Hüseyin nâm kimesne mahalle-i ma‘mûre subaşısı olan Mehmed Subaşı b. İskender nâm kimesne mahzarında da‘vâ kılıp mezbûr Mehmed Subaşı benim li eb ve üm karındaşım Budak b. Hüseyin nâm kimesne fevt oldukda mahalle-i mezbûrede vâki‘ bir kır bârgîrini ve bir mor kürklü ferâcesini ve bir anteri kaliçe ve bir köhne kaltağını ve bir köhne mor çakşırını ve iki yüz kırk dört nakid akçesini zabt eylemiş hâlâ verâseti bana münhasıradır şer‘le taleb eylerim dedikde gıbbe’s-suâl mezbûr Mehmed Subaşı sen onun li eb ve üm karındaşı olup verâseti sana münhasıra olduğunu isbât eyle dedikde udûl-i müslimînden vilâyet-i mezbûreden Ali b. Abdullah ve Mehmed b. Nebî Yusuf nâm kimesneler fi’l-vâki‘ müteveffâ-yı mezbûrun Budak Hüseyin nâm müteveffânın oğludur ve müdde‘î-i mezbûr Deniz dahi mezkûr müteveffâ Hüseyin oğludur verâseti mezbûr Deniz’e münhasıradır ve müdde‘î-i mezbûr ve müteveffâ-yı mezbûr Deniz dahi mahalle-i Kurşunlu’da mütemekkinler idi biz bu husûsa şâhidleriz şehâdet dahi eyleriz dediklerinde şehâdetleri hayyiz-i kabûlde vâki‘ oldukdan sonra zikr olunan metrûkât merkūm Mehmed Subaşı’dan mezbûr Deniz’e teslîm olunmasına hükm olundukda mezbûr Deniz merkūm Mehmed Subaşı yedinden bi’t-tamâm alıp kabz eyledim dediği kayd olundu. Fi’t-târihi’l-mezbûr. Şuhûdü’l-hâl: Mahmud b. Süleyman, Turhan b. Abdullah, Hüseyin er-râcil, Musli Çelebi el-kâtib