Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 170 Hüküm no: 182 Orijinal metin no: [18a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Mehmed’in, Mustafa Paşa’daki alacağını tahsil ettiği Oldur ki Dergâh-ı âlî bevvâblarından fahrü’l-emâsil ve’l-akrân Ahmed Bey b. Mehmed nâm kimesne mahfil-i şer‘de emîrü’l-ümerâi’l-kirâm sâbıkan Sivas Beylerbeyisi olan Mustafa Paşa hazretlerinin tarafından husûs-ı âtîye şer‘an vekîlleri olan Mustafa Bey b. Sinan nâm kimesne mahzarında ikrâr ve i‘tirâf edip bundan akdem dokuz yüz seksen dokuz senesinde vâki‘ sûr-ı hümâyûnda mezbûr Mustafa Paşa Mısır’da cündîlere serdâr iken benden alâ tarîki’l-karz altı bin nakd râyicü’l-vakt akçe almışdı hâlen zikr olunan altı bin akçe bi’t-tamâm alıp kabûl ve kabz edip zimmetinde bir akçe ve bir habbe bâkī kalmadı müşârunileyh Mustafa Paşa hazretlerinin zimmetlerini deyni mezbûrdan ibrâ’ ve ıskāt eyledim dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr bi’l-muvâcehe tasdîk ve’l-müşâfehe tahkīk eylediği kayd olundu. Şuhûdü’l-hâl: Rıdvan Ağa b. Abdullah Bevvâbân, Piyâle Kethüdâ b. Abdullah, Hüseyin Ağa b. Abdülmüste‘ân, diğer Hüseyin Ağa b. Abdullah, Hasan b. Ali ve gayruhüm