Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 171 Hüküm no: 185 Orijinal metin no: [18a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa ve İsa’nın, atlarla avârız paralarını İstanbul’a getirirken telef ettikleri Budur ki Vilâyet-i Anadolu’da vâki‘ Seyyid Gāzi kazâsında bi’l-fi‘l kadı olan kıdvetü’l-kuzâti’l-ümem Mevlânâ Alâaddin Efendi mahfil-i kazâda Dergâh-ı âlî bevvâblarından olup hâlâ bâ-emr-i pâdişâhî mûcebince ulaklık ile Şehr-i Zol ve İmadiye ve (…) ve Karadağ’a giden Mustafa ve İsa nâm kapucılar mahzarlarında takrîr-i kelâm edip ber mûceb-i fermân-ı âlî kadılığımın avârızını cem‘ edip mahrûse-i Üsküdar’a dâhil ve iskeleye vâsıl olduğumda hazîneyi tahmîl eylediğim bir kır ve bir sarı katırımı içinde mevcûd hazîneyi telef eylediler suâl olunup vukû‘ı üzre sicil olunmasın taleb ederim dedikde gıbbe’s-suâl mezbûr İsa Bey ikrâr edip fi’l-hakīka mûmâileyh efendiden zikr olunan katırların ahz eyleyip sarı katırı verip kır katırı mezbûr Mustafa’ya verdim ve merkūm binip revâne oldu deyu i‘tirâfı kayd olundu. Şuhûdü’l-hâl: Mehmed Çelebi [b.] el-müstaid, diğer Mehmed Çelebi [b.] Hacı, Muttalib [b.] Süleyman ve gayruhüm