Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 177 Hüküm no: 198 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Laskari v. Manol’un, İskender Bey Vakfı’na borcunu ödediği Oldur ki İskender Bey Vakfı’na hâlâ câbi olan Ali Bey b. İskender el-cündî mahfil-i şer‘de karye-i Kadı’dan Laskari v. Manol nâm kimesne mahzarında ikrâr ve i‘tirâf edip merhûm-ı mezbûrun vakıf akçesinden karye-i mezbûre papazı Manol v. Lazari’de on dört bin akçe karzdan ve bin dört yüz akçe ribhden akçesi olup mezbûr Laskari merkūm Papa Manol v. Lazari’den mezbûr buzhâneyi alıp onun akçesinden zikr olunan on beş bin dört yüz akçeyi merkūm Laskari yedinden bi’t-tamâm asıldan ve fer‘den alıp kabz edip mezbûr Papa Manol zimmetinde bir akçe ve bir habbe kalmadı dedikde mukırr-ı mezbûrun vech-i meşrûh üzre vâki‘ olan ikrârını mezbûr Laskari bi’l-muvâcehe tasdîk ve’l-müşâfehe tahkīk eylediği bi’t-taleb kayd olundu. Fi’t-târihi’l-mezbûr. Şuhûdü’l-hâl: Mehmed b. Behrâm, Ali Bey el-cündî, Attâr Hüsrev b. Abdullah, Ahmed Bey an Ebnâ-i Silahdârân, Mustafa b. Mehmed, Usta Ahmed Bey b. Kaya, Hasan Bey b. Sâdık, Sevindik b. Abdullah, Mustafa b. Eymir