Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 256 Hüküm no: 386 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza b. Mustafa’nın, bahçesini Mehmed’e sattığı Oldur ki Üsküdar’da Tenbel mahallesi sâkinlerinden el-Hâc Hamza b. Mustafa nâm kimesne mahfil-i şer‘de işbu oğlu Mehmed mahzarında ikrâr ve takrîr-i merâm kılıp mezbûr Mehmed’e, Davud Paşa mahallesinde vâki‘ bir tarafı Vâlide Sultan vakfına ve bir tarafı Hüseyin ve Mustafa ve Hacı Hamza eytâm-ı mülkleriyle ve bir tarafı tarîk-i hâsla mahdûd olup eşcâr-ı müsmire ve gayrımüsmireyi müştemil olan bahçemi cümle tevâbi‘ ve levâhıkı ile on iki bin nakd râyic fi’l-vakt akçeye bey‘-i bâtt-ı sahîh-i şer‘-i birle bey‘ edip yüz sikke kırmızı filoriyi mahkemede yüz yirmişer akçe hesâbı üzre bi’t-tamâm alıp kabz edip mebî‘-i mezbûru mezbûr Mehmed’e teslîm eyledim ol dahi tesellüm eyledi dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-mezbûr bi’l-muvâcehe ve’l-müşâfehe tasdîk ve tahkīk eyledi bu hurûf ketb olunup yed-i tâlibe vaz‘ olundu. Fi’t-târihi’l-mezbûr. Şuhûdü’l-hâl: İlyas Bey el-cündî, Hüseyin b. Mustafa, Hacı Memi b. Abdullah, Hacı Hüseyin b. Abdullah, Hacı Ali b. Mehmed, Mustafa b. Halil, Hacı Mehmed b. Abdullah