Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 259 Hüküm no: 395 Orijinal metin no: [37b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maraş beylerbeyiliğindeki hassa çakır müjdesinin iltizâma verilmesi Vilâyet-i Karaman’da vâki‘ Aksaray nâm kasabadan Halil b. Cihanşah nâm kimesne mahfil-i kazâda kıdvetü’l-emâcid ve’l-ekârim umdetü’l-mefâhir ve’l-mekârim Çakırcıbaşı İbrahim Ağa tarafından husûs-ı âtîye nehc-i şer‘î üzre vekîli olan fahrü’l-akrân Feridun Ağa b. Abdülmennân mahzarında ikrâr ve takrîr-i merâm kılıp işbu elf senesinde Maraş Beylerbeyiliği’nden vâki‘ hâssa çakır müjdesi bahâsından yirmi bin akçeye iltizâm ve kabûl eyledim sene tamâmında haklaşmak şartıyla deyip ve yine kasaba-i merkūmeden Hızır ve Abdi b. Ömer ve Kaya b. Şaban nâm kimesneler meblağ-ı mezbûre biz kefîl olduk dediklerinde mukırrûn-ı mezbûrunun vech-i meşrûh üzre vâki‘ olan ikrârlarını vekîl-i mûmâileyh vicâhen ve şifâhen tasdîk ve tahkīk eyledikden sonra bu vesîka-i enîka alâ mâ hüve’l-hakīka ketb olundu. Tahrîren fi’t-târihi’l-mezbûr. Şuhûdü’l-hâl: El-Hâc Hüseyin Çavuş, Müstecâb b. Mustafa, Mehmed b. Hasan, Mehmed b. Behrâm, Cafer b. Abdullah, Ali Bey b. Abdullah ve gayruhüm