Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 324 Hüküm no: 543 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Hamza’nın, Pervâne Abdullah’a borcuna karşılık evini rehin bıraktığı Budur ki Ali b. Hamza nâm kimesne mahfil-i kazâda Hâcce Hâtun mahallesinin avârız akçesine mütevellî olan Pervâne Abdullah mahzarında ikrâr edip zikr olunan akçe bin akçe karz ve çuka bahâsından yüz elli akçe târih-i kitâbdan bir sene tamâmına değin lâzımü’l-edâ deynimdir ve meblağ-ı mezbûr mukābelesinde inde’l-ahâlî ma‘lûmü’l-hudûd evimi meblağ-ı mezbûr mukābelesinde rehin vaz‘ eyledim dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen tasdîk edip mâ vaka‘a bi’t-taleb tahrîr olundu. Tahrîren fî evâili Şevvâli’l-mükerrem sene elf. Şuhûdü’l-hâl: Ramazan b. Hacı Mehmed, Yakub b. Akīdeci, Hacı Sinan b. Turgud, Sefer b. Abdullah ve gayruhüm