Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 331 Hüküm no: 560 Orijinal metin no: [52b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Mustafa’nın eski eşi Müslime’ye sattığı cariyenin bedelini istemesi Mahrûse-i Üsküdar’dan Veli b. Mustafa mahfil-i kazâda sâbıkan zevcesi olan Müslime Hâtun bt. Abdullah mahzarında takrîr ve da‘vâ kılıp merkūme Müslime benim bir Rûsiyyetü’l-asl câriyemi yirmi sekiz bin akçeye bey‘ edip dört bin akçesin kendinin bir evini satıp aldım mâ‘adâsını vermekde te‘allül eder şer‘le hakkım taleb eylerim dedikde gıbbe’s-suâl mezbûre Müslime cevâb verip zikr olunan câriyeyi mezbûr Veli’den ben bey‘-i kat‘î ile dört bin akçeye alıp mezbûr Veli benim evimi vekâleten dört bin altı yüz akçeye satıp dört bin akçesin câriye bahâsına tutup altı yüz akçesin bana verdi bu husûsa şâhidlerim vardır deyicek udûl-i müslimînden İbrahim b. Memi ve Mehmed b. Abdullah el-cündî ve Hasan b. Sâdık nâm kimesneler meclis-i şer‘de li ecli’ş-şehâde hâzırûn olup fi’l-hakīka müdde‘î-i mezbûr Veli bizim yanımızda ikrâr edip kendi zevcem Müslime’ye dört bin akçeye bir Rûsiyyetü’l-asl câriye satıp ve kendinin dört bin altı yüz akçeye bir evin dahi satıp dört bin akçesin câriye bahâsına tuttum altı yüz akçesini kendiye verdim dedi biz bu husûsa şâhidleriz şehâdet dahi eyleriz dediklerinde şehâdetleri hayyiz-i kabûlde vâki‘ oldukdan sonra mâ vaka‘a kayd şud. Şuhûdü’l-hâl: Yahya Çelebi b. Ahmed Dede, Yahya Bey b. Mahmud, Hasan Çelebi b. Mehmed Subaşı, el-Hâc Hasan b. el-Hâc Mustafa, el-mukayyid