Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 348 Hüküm no: 600 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Receb’in, Fati bt. Yusuf’a sattığı bağın tasarrufuna Halil b. Mezid’in engel olduğu Budur ki Mehmed b. Receb mahfil-i kazâda Halil b. Mezid mahzarında da‘vâ edip mahrûse-i Üsküdar muzâfâtından Kuzguncuk nâm karye kurbunda vâki‘ bir tarafı metropolid bağıyla ve bir tarafı Divâne Kuyumcu bağıyla ve bir tarafı Mehmed ed-debbâğ bağıyla ve bir tarafı mezbûr Halil bağıyla mahdûd olan bağı târih-i kitâbdan bir yıl mukaddem Fati bt. Yusuf nâm hâtundan bin beş yüz akçeye alıp iki yüz akçesini edâ edip bin üç yüz akçesini edâ edicek olmuş iken mezbûr Halil fuzûlî tasarruf edip taleb ederim dedikde gıbbe’s-suâl ve akībe’l-inkâr udûlden Mustafa b. Abdullah ve Himmet b. Mustafa nâm kimesneler edâ-yı şehâdet-i şer‘iyye edip zikr olunan bağı mezbûre Fati’den müdde‘î-i mezbûr Mehmed’e bir yıl mukaddem bin beş yüz akçeye bey‘ edip iki yüz akçesini alıp kabz edip bin üç yüz akçesini dahi alacak olmuş idi bu husûsda şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra mâ vaka‘a bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Hacı Ramazan [b.] Nasûh, Ali b. Mehmed, Mustafa b. Mehmed, Sefer b. Abdullah ve gayruhüm