Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 350 Hüküm no: 605 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tâci Hâtun bt. Sinan’ın, ölen Haşimi Seyyid Mehmed Çelebi’deki alacağı için rehin aldığı kılıcı, geri verdiği Sultan Tepesi mahallesi sâkinelerinden Tâci Hâtun bt. Sinan mahfil-i kazâda merhûm ve mağfûrun-leh bundan akdem vefât eden Hâşimî Seyyid Mehmed Çelebi b. es-Seyyid Mahmud nâm kimesnenin yetîmine kıbel-i şer‘den vasî nasb olan Ali Çelebi b. Mahmud mahzarında ikrâr ve takrîr-i merâm kılıp merhûm-ı mezbûr Hâşimî Mehmed Çelebi benden on üç bin akçe alıp bir kor kılıç kodu idi hâlâ vasîyy-i merkūm yedinden meblağ-ı mezbûr on üç bin akçeyi asıldan ve dört yüz akçe ribhden alıp kabûl ve kabz edip zikr olunan kılıcı vasîyy-i merkūme teslîm eyledim dedikde vasîyy-i merkūm dahi meblağ-ı mezbûru verip zikr olunan kılıcı aldım kabz eyledim dediği kayd olundu. Şuhûdü’l-hâl: Sinan Efendi b. Mahmud, Mehmed b. Bekir, Yusuf Çelebi b. Budak, Mesud Çelebi b. Birâder-i Kalfa, İbrahim b. Sinan, Mehmed b. Hasan, Ahmed b. Mahmud, Müstedâm Bey