Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 388 Hüküm no: 691 Orijinal metin no: [65b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksandra bt. Doka’nın, babasından kalan mülkü Dimitri v. Doka’ya sattığı Budur ki Mahrûse-i Üsküdar muzâfâtından Cezâyir nâhiyesine tâbi‘ Heybeli Ada demekle ma‘rûf ada sâkinelerinden Aleksandra bt. Doka nâm zimmîye mahfil-i kazâda bâ‘isü’l-hurûf Dimitri v. Doka mahzarında takrîr-i kelâm edip zikr olunan adada vâki‘ bir tarafı Aleksi v. Maçuka mülkü ile ve bir tarafı Petro Reis mülkü ile ve bir tarafı Kostantin mülkü ile ve tarîk-i âm ile mahdûd olan ev babam Doka’nın olup mürd oldukda vasîm zarûret-i nafaka ve zarûret-i deyn yok iken gabn-ı fâhiş ile mezbûr Dimitri’nin babası Doka’ya bey‘ edip mürd oldukda mezbûr Dimitri’ye intikāl eylemişdir hâlâ taleb ederim deyu da‘vâ ve taleb eylemiş idim hâlâ muslihûn tavassut edip bin beş yüz akçeye ibrâ’ ve ıslâh edip bedel-i sulh olan bin beş yüz akçeyi mezbûr Dimitri yedinden bi’t-tamâm alıp kabz edip husûs-ı mezbûr için zimmetini ibrâ’-i âm ile ibrâ’ eyledim ba‘de’l-yevm asâleten ve vekâleten da‘vâ sâdıra olursa lede’l-hükkâm istimâ‘ olunmaya dedikde mukırra-i mezbûrenin vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fî evâhiri Zilka‘deti’l-harâm sene elf. Şuhûdü’l-hâl: Hasan [b.] Sâdık, Muttalib [b.] Süleyman, Mehmed b. Behrâm, Muhyiddin [b.] Abdullah, Hamza Bey [b.] Abdullah, Aleksi [v.] Maçuka, Manol Bozacı, Andon Bozacı, İstavrati [v.] İstatora, Yani Cerrâh, Mihal [v.] Detor ve gayruhüm Yevmü’l-isneyn 23 Zilka‘deti’l-harâm