Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 395 Hüküm no: 707 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yoros ve Kanlıcak mukâtaasının iltizâma verilmesi Mahmiye-i Kostantıniyye sâkinlerinden olup hâssa reislerinden olan Ferhad Reis b. Abdullah mahfil-i kazâda mahrûse-i Üsküdar ze‘âmetinden tefvîz olup Yoros ve Kanlıcak mukāta‘asına ber vech-i iltizâm emîn olan Hüseyin Bey b. Ali mahzarında takrîr-i da‘vâ kılıp livâ-i Kocaeli’nde Yoros kazâsına tâbi‘ Tepesekili nâm karyede vâki‘ bağ ve bahçenin kadîmden bu âna gelince defter-i hâkānîde her sene kırkar akçe mukāta‘a-i zemîn bağlanmışken mukāta‘asına râzı olmayıp benden iki senede hilâf-ı kānûn öşr alıp zulm eyledi şer‘le mâ vaka‘a suâl olunmasın taleb eylerim dedikde gıbbe’s-suâl emîn-i mezbûr cevâb verip ben bilmem eğer temessükü varsa getirsin deyicek yedinde olan mümzâ ve mahtûm vilâyet defteri sûretine nazar olundukda vech-i meşrûh üzre olduğu mastûr ve mukayyed olup ve defter-i hâkānîde maktû‘ ise ve öyle verile geldiyse üslûb-ı sâbık üzre aldırasın deyu emr-i şerîf verilip ber mûceb-i emr-i şerîf ve defter-i münîf yine üslûb-ı sâbık üzre beher sene kırkar akçe mukāta‘a-i zemîn alınmasına tenbîh olunup ve mâ hüve’l-vâki‘ tahrîr olundu. Fi’t-târihi’l-mezbûr. Şuhûdü’l-hâl: Fazlı Çelebi b. Mehmed, Ahmed Çavuş Dergâh-ı âlî, Veli Bey b. Alagöz el-cündî, Hızır Hacı el-müezzin Yevmü’l-hamîs fî 26 Zilka‘deti’l-harâm li sene elf