Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 401 Hüküm no: 721 Orijinal metin no: [68b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın mehir isteğinin, boşanırken ferâgat ettiğinden reddedildiği Bendereğli sâkinelerinden Emine bt. Abdullah nâm hâtun mahfil-i kazâda Maksud Reis b. Emirza mahzarında takrîr-i da‘vâ kılıp sâbıkan mezbûr Maksud Reis benim zevcim idi bana talâk verip dört bin akçe mehrim vardır şer‘le taleb eylerim dedikde gıbbe’s-suâl mezbûr Maksud Reis bi’l-muvâcehe cevâb verip fi’l-hakīka mezbûre Emine’nin dört bin akçe mehr-i mü’ecceli var idi ammâ bundan evvel mehir ve nafaka-i iddeti üzerine hul‘ eyledim deyu hüccet-i şer‘iyye ibrâz eyleyip nazar olundukda sene semân ve tis‘în ve tis‘a-mi’e Şubat’ı târih-i ile müverrah sâbıkan mahrûse-i Üsküdar’da nâ’ibü’ş-şer‘ Nurullah Efendi imzâsıyla mümzâ ve mührüyle mahtûm vech-i meşrûh üzre hücceti olduğundan mâ‘adâ elinde mehir verilmek için fetvâ-yı şerîfesi olmamağın mezbûre Emine da‘vâ-yı merkūm’dan men‘ olunduğu kayd olundu. Şuhûdü’l-hâl: Hüseyin b. Behrâm, Mehmed b. Behrâm, Mustafa b. Mehmed, Şemseddin b. Sâdık, İstiğfâr Müezzini Ömer b. Abdurrahman