Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 407 Hüküm no: 734 Orijinal metin no: [70a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sattığı dükkan yanan Musli Çelebi’nin, dükkandaki hak iddiasının geçersiz olduğu Mahrûse-i Üsküdar sâkinlerinden olup hâssa zağarcılardan olan kıdvetü’l-akrân İlyas Bey b. Abdülmennân mahfil-i kazâya gelip bundan akdem Süleyman b. Mahmud nâm ma‘tûhun kıbel-i şer‘den nâzırı olan Mustafa b. Abdullah ma‘tûh-ı mezbûrun Selman Ağa mahallesinde bir tarafı tarîk-i âm ve iki tarafı Musli Çelebi el-cündî mülkü ile ve bir tarafı mezbûr Süleyman mülkü ile mahdûd ve mümtâz olan ahır harâba müşrif olup bey‘i evlâ olmağın nısfını bir bâb dükkânıyla ve mezbûr Musli Çelebi’den tarafa olan iki ocaklı duvarıyla ve damlalığıyla ve kapı yeriyle bana on sekiz bin akçeye bey‘ eyleyip teslîm-i mebî‘ ve kabz-ı semen kılıp birkaç yıl tasarruf edip da‘vâ etmemiş iken hâlâ ihrâk vâki‘ oldukda zikr olunan kapı yeri ve duvarı ve damlalığı mezbûr Musli Çelebi benimdir deyu nizâ‘ eder zikr olunan ahırın üzerine varılıp vukû‘ı üzre görülmesin taleb ederim dedikde zeyl-i kitâbda ismi mastûr olan Müslümanlar ile üzerine varılıp mezbûr Musli Çelebi’den suâl olundukda cevâb verip zikr olunan duvarı ve damlalık ve kapı yeri ahırın nısfı ile ma‘tûh-ı mezbûr ve nâzırı bana bey‘ eylemişdir benim mülkümdür deyip ve mezbûrân Süleyman ve nâzırı Mustafa ihzâr olunup suâl olundukda zikr olunan iki ocaklı duvarlarıyla damlalık mezbûr İlyas Bey’e ahırın nısfı ile bey‘ eyleyip mülküdür deyu cevâb verdiklerinde mezbûr Musli Çelebi zikr olunan duvarı ve damlalık ve kapı yerini kendinin idiğini beyâna kādir olmayıcak mu‘ârazadan men‘ olunup ve mâ hüve’l-vâki‘ tahrîr olundu. Tahrîren fi’t-târihi’l-mezbûr. Şuhûdü’l-hâl: Kıdvetü’l-akrân Hamza Subaşı yayabaşıyân-ı hâssa, kıdvetü’l-akrân Mehmed Subaşı yayabaşı, Ali Subaşı yayabaşıyân-ı Dergâh-ı âlî, Yusuf b. Mahmud Bey er-râcil, Murad Bâşe er-râcil, Behrâm Bey [b.] Abdullah, kıdvetü’l-emâcid Hüseyin Ağa ez-Zevvâku’s-Sultânî, Cafer b. Alagöz ve gayruhüm