Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 420 Hüküm no: 764 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey’in, ölen Mustafa b. İbrahim’den satın aldığı arâzilerin tasarrufuna oğlu Hasan Bey’in izin vermediği Dîvân-ı Hümâyûn kâtiblerinden kıdvetü’l-muharrirât Hasan Bey mahfil-i kazâda Yoros kazâsına tâbi‘ Kesirli nâm karye sipâhisi Hasan Bey mahzarında takrîr-i kelâm edip bundan akdem karye-i mezbûreden olup vefât eden Mustafa b. İbrahim hâl-i hayâtında babasından irs-i şer‘le intikāl eden yerlerini ve bostan yerlerini ve dam yerlerini bana tefvîz edip mukābele-i tefvîzde üç bin nakid akçeyi alıp kabz edip mezbûr Hasan Bey izin vermiş iken hâlâ mezbûr Mustafa vefât etmek ile tefvîze izin vermedim deyu âhara tapu ile vermiş suâl olunsun dedikde gıbbe’s-suâl mezbûr Hasan Bey cevâb verip fi’l-hakīka mezbûr Hasan Bey mahrûse-i Üsküdar’a gelip merkūm Mustafa’nın babasından irs-i şer‘le intikāl eden yerlerini aldım dedikde Allahü te‘âlâ mübârek eyleye ondan öşür almazdım hatâ eyledim dedim lâkin yedine tezkire vermedim dediği bi’t-taleb tahrîr olundu. Tahrîren fi’t-târihi’l-mezbûr. Şuhûdü’l-hâl: Kıdvetü’l-cüyûş Bâkī Çavuş, Veli Bey el-cündî, Muttalib [b.] Süleyman, Receb Bey el-cündî, Şaban b. Pîrî ve gayruhüm Yevmü’l-ahad er-rabi‘-i aşer min Zilhicceti’ş-şerîfe