Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 472 Hüküm no: 887 Orijinal metin no: [85a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem Hâtun bt. Abdullah’ın, evini haksız kullandığı iddiasıyla Mustafa Bey’e açtığı davanın reddedildiği Oldur ki Karye-i Çengel’den olup küfr ve dalâletde iken Aleksi bt. Yorgi nâm [zimmîye] Müslüman olup hâlâ mezbûre İslâm’la ârâste ve hilye-i îmân ile pîrâste olup Meryem Hâtun bt. Abdullah nâmıyla müsemmâ olan hâtun mahfil-i kazâda Dergâh-ı âlî yeniçerilerinden Mehmed Beyoğlu Mustafa Bey mahzarında takrîr-i merâm ve ta‘bîr-i kelâm edip karye-i mezbûrede mîrî mahzen ile benim mülküme ve Zevyo mülküyle ve tarîk-i âmla mahdûd olup babamdan bana intikāl eden menzili mezbûr Mustafa Bey bi gayr-i hak tasarruf eder suâl olunup men‘ olunmasın taleb eylerim dedikde gıbbe’s-suâl mezbûr Mustafa Bey bi’l-muvâcehe cevâb verip zikr olunan menzili merkūme Meryem dahi kāfire iken sâbıkan İstanbul’da Patriyan Yermiye nâm râhîbe bey‘ edip ol dahi Feragi v. Andriye’yi vekîl edip babam Mehmed Bey’e bey‘ eyledi vech-i meşrûh üzre iki âdet mülknâmemiz vardır ve mezbûre Meryem dahi kāfire iken Toma v. Kosta’yı her husûsa vekîl-i mutlak eyledi kendiye suâl olunsun dedikde merkūme Meryem dahi bi’l-mukābele fi’l-hakīka mezbûr Toma’yı beni râhine eyledi cümle emlâkim ne eylerseniz eylen dedim deyu bi tav‘ ve’r-rızâ ikrâr ve i‘tirâf eylediği kayd olundu. Şuhûdü’l-hâl: Mustafa Bey [b.] Abdullah, Mehmed Bey [b.] Hasan, Hasan b. Sâdık ve gayruhüm Yevmü’l-isneyn fi’l-yevmi’l-ışrîn min şehri Muharremi’l-harâm