Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 474 Hüküm no: 892 Orijinal metin no: [85b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasnâ Hâtun bt. Abdullah’ın oğlu ölen Hüsrev’den kalan hisseyi istemesi Mahrûse-i Üsküdar sâkinelerinden Hasnâ Hâtun bt. Abdullah tarafından husûs-ı âtîye Mehmed b. Ömer ve Ferhad b. Abdullah şehâdetleriyle vekâleti sâbite olan fahrü’l-hutebâ Mevlânâ Murad Halîfe b. Abdurrahman mahfil-i kazâda mahrûse-i mezbûre subaşısı fahrü’l-akrân Müstedâm Bey b. Abdülmennân ve Kefçe mahallesinden olup vefât eden Hüsrev b. Abdullah nâm kimesnenin zevcesi Ayşe Hâtun bt. es-Seyyid Hüseyin tarafından nehc-i şer‘î birle şâhidân-ı mezbûrân şehâdetleriyle yine husûs-ı âtîye vekâleti sâbite olan Ahmed Halîfe b. Şeyh Mehmed mahzarlarında takrîr-i da‘vâ edip müvekkilimin müteveffâ-yı mezbûr Hüsrev sulbü oğludur metrûkâtından hisse-i şer‘iyyesin mezbûrân vermekde te‘allül ederler vekâleten taleb eylerim dedikde gıbbe’s-suâl ve akībe’l-inkâr müddî‘-i mezbûrun da‘vâsına muvâfık beyyine taleb olundukdan sonra udûl-i müslimînden ve sikāt-ı muvahhidînden Mehmed Çelebi b. el-Hâc Hamza ve el-Hâc Abdurrahman b. Abdi ve Ali b. Mustafa ve el-Hâc Memi b. Abdullah ve Mehmed b. Yusuf ve Mustafa b. Ferhad ve Mehmed b. Kirişçi Mustafa ve Ferhad b. Abdullah nâm kimesneler fi’l-vâki‘ müteveffâ-yı mezbûr Hüsrev müdde‘î-i mezbûrun müvekkilesi Hasnâ’nın sulbü oğludur bu husûsa şâhidleriz şehâdet dahi ederiz dediklerinde şâhidûn-ı mezbûrunun şehâdetleri hayyiz-i kabûlde vâki‘ olduğu kayd olundu Şuhûdü’l-hâl: Hamza Subaşı, Mehmed b. Behrâm, Mustafa b. Mehmed, Şaban b. Pîrî