Üsküdar Mahkemesi 396 Numaralı Sicil (H. 1150-1151 / M. 1737-1738) cilt: 68, sayfa: 212 Hüküm no: 230 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un eşi Ebubekir Bey’den muhâlaa yoluyla boşandığı Fi’l-asl vilâyet-i Rumeli’de medîne-i Sofya mahallâtından Başçeşme mahallesi sâkinelerinden olup medîne-i Üsküdar’da Evliyâ Hoca mahallesinde müsâferet vechi üzere sâkine ve zâtı vech-i şer‘î üzere mu‘arrefe olan Ümmügülsüm bt. Hüseyin nâm hatun meclis-i şer‘-i şerîf-i enverde zevc-i muhâli‘i işbu râfi‘ü’l-vesîka Ebubekir Bey b. Hasan nâm kimesne mahzarında ikrâr ve takrîr-i kelâm edip mezbûr Ebubekir Bey zevcim olup beynimizde hüsn-i zindegânemiz olmayıp ben hul‘a tâlibe olduğum ecilden mezbûrun zimmetinde mütekarrir ve ma‘kūdün-aleyh olan iki bin akçe mehr-i müeccelimden fâriğa olup ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî-şehri Rebî‘i’l-evvel li-seneti ihdâ ve hamsîn ve mi’ete ve elf. Şuhûdü’l-hâl: el-Hâc Ömer Ağa b. Mehmed, el-Hâc Hanefi b. Ali, Mehmed Beşe b. Bayezid, Cebeci Mustafa, Salih Beşe b. Bayezid, Hasan Bey b. Ramazan, es-Seyyid Süleyman b. Mehmed.