Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 58 Hüküm no: 17 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’ye küfür eden Kara Mustafa’ya tazir gerektiği Ma‘rûz; Üsküdar’da Arakıyeci el-Hâc Mehmed mahallesinden Mustafa b. Ali hasmı diğer Kara Mustafa b. Ali nâm kimesneyi meclis-i şer‘a ihzâr ve muvâcehesinde mezbûr Kara Mustafa târih-i i‘lâm günü dahve-i kübrâda mahalle-i mezbûrede tarîk-i âmda ağzıma ve gözüme ve dîn ve îmânıma muvâcehemde şetm eyledi deyü ba‘de’d-da‘vâ ve’l-inkâr müdde‘î-i mezbûr müdde‘âsını udûlden yine Üsküdar’da Pazarbaşı mahallesi sâkinlerinden Hüseyin Beşe b. Hasan ve Süleyman b. Mehmed nâm kimesnelerden her biri fi’l-hakīka târih-i i‘lâm günü dahve-i kübrâda mahalle-i mezbûrede tarîk-i âmda işbu müdde‘î-i mezbûr Mustafa’ya muvâcehesinde ağzına ve gözüne [din] ve imânına cimâ‘ lafzıyla bizim huzûrumuzda şetm eyledi deyü edâ-i şehâdet-i şer‘iyye edip ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Kara Mustafa’ya ta‘zîr ve tecdîd-i îmân ve nikâh lâzım geldiği bi’l-iltimâs huzûr-ı âlîlerine i‘lâm olundu. Fî 18 Rebî‘ülevvel sene [1]154