Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 59 Hüküm no: 20 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbti taifesinden olup vefat eden Havva’nın terekesinin taksimi Ma‘rûz; Derûn-ı arzuhâlde mezkûrü’l-ism müteveffiye Havva nâm Kıbtîye’nin verâseti sadriye kebîre kızı Sâliha’ya ve sadrî oğlu müteveffâ Ali’nin sulbî kebîr oğlu Mehmed’e ve sulbiye kebîre kızı Havva’ya münhasıra ve tashîh-i mes’elesi altı sehimden üç sehmi kızı mezbûreye ve iki sehmi mezbûr Mehmed’e ve bir sehmi mezbûre Havva’ya isâbeti tahakkukundan sonra mezbûrân Mehmed ve Havva nâm karındaşlar dîvân-ı âlîlerinde ma‘kūd meclis-i şer‘de menzil-i âti’z-zikre vaz‘-ı yedi mütehakkık olan Helvâcı Ahmed muvâcehesinde Üsküdar’da Vâlide-i atîk mahallesinde vâki‘ bir tarafdan Paçacı Osman veresesi mülkleri ve bir tarafdan Âişe Hatun mülkü ve bir tarafdan İbrahim tasarrufunda olan menzil ve bir tarafdan tarîk-i âm ile mahdûd büyût-ı adîde ve tahtında bir demirci dükkânı[nı] müştemil bir bâb mülk menzil müteveffiye-i mezbûre Havva’nın hayatında mülkü olup ba‘de’l-vefât tashîh-i merkūm (...) bizim ile kızı merkūmeye mevrûs olmağın menzil-i merkūmda olan üç sehim hisse-i irsiyelerimizi [bi’l-is]tihkāk taleb ederiz deyü ba‘de’d-da‘vâ ve’l-inkâr müdde‘iyân-ı mezbûrân müdde‘âlarını lede’t-tezkiye adâletleri zâhir İsmail b. Mehmed ve İbrahim b. Osman nâm kimesneler şehâdetleriyle vech-i şer‘î üzere isbât etmeğin mûcebince müdde‘iyân-ı mezbûrânın üç sehim hisselerinden kasr-ı yedine mezbûr (...) tenbîh olunduğu i‘lâm. Fî 21 Rebî‘ülâhir sene [1]154