Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 64 Hüküm no: 31 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapların kestikleri koyunların bağırsaklarını kirişcilerden başkalarına vermelerinin yasak olduğu Ma‘rûz; Ashâb-ı arzuhâl Üsküdar’da kirişci tâifesinden medîne-i Üsküdar’da kasab tâifeleri ile mürâfa‘a olduklarında kasab tâifeleri kadîmi üzere zebh eylediklerinde ağnamın bağırsaklarını kirişci tâifesine verip onlar dahi beher şehr üçer guruşdan senede otuz altışar guruş vermek kadîmi nizâmları olmakla bin yüz yirmi yedi senesi târihiyle müverrah hüccet-i şer‘iyye mûcebince nizâm-ı mezkûr üzere mürâ‘ât olunagelmiş iken kasab tâifesi bu esnâda nizâm-ı kadîme mugāyir harekete tesâddî etdirilmeye deyü da‘vâ ve takrîr-i meşrûhlarına mutâbık hüccet-i şer‘iyye ibrâz ve kasab tâifesi mazmûn-ı hücceti mukırr ve mu‘terîf olup lâkin bu esnâda koyun ziyâde bahâda olduğundan nizâm-ı cedîd taleb ederiz dediklerinde bağırsak âhar kimesneye ferâğ? olmayıp ve kirişci tâifesinden gayri müşteri olmamağla mukaddemâ verilen nizâma mugāyir hareket olunmamak üzere kasab tâifesine tenbîh olunup “el-kadîm yütrakü alâ-kıdemihî” fehvâsınca ibkā olunup kadîmi bu vechle olduğu ber-mûceb-i fermân-ı âlî huzûr-ı âlîlerine i‘lâm. Fî 2 Cemâziyelevvel sene 1154