Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 66 Hüküm no: 36 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi Âmine’den gasbettiği eşyaları iade etmesi için Ümmühani’ye tenbihte bulunulduğu Ma‘rûz; Sahib-i arzuhâlin zevcesi Âmine nâm hatun tarafından vekîl-i sâbitü’l-vekâlesi Halil Efendi müvekkile-i mezbûrenin vâlidesi Ümmühani ile dîvân-ı âlîlerinde ma‘kūd meclis-i şer‘de mürâfa‘a-i şer‘-i şerîf oldukda anası mezbûrenin yedinde olan mazmûnu mukaddemâ sâbit olan hüccetin derûnunda olan eşyâdan mâ‘adâ müvekkilem mezbûrenin eşyâ-i memlûkesinden bir kaneviz cübbe ve bir kaneviz ferâce ve bir kakum kürk ve bir baş yastığı ve bir baş yemenî ve bir şalvar ve bir dülbend örtüsü ve bir peşkir ve dört na‘albekî ve bir taba ve iki yüz yastığı ve doksan vakıyye (...) ile otuz guruşunu ahz ü gasb eyledi deyü da‘vâ etdikde mezbûre Ümmühani [7a] cevâbında zikrolunan eşyâ ile meblağ-ı merkūmu mezbûre bana hîbe ve temlîk ve teslîm ve kabz ve kabûl edip ol vechile a‘yânı yedimde mevcûddur deyü def‘le mukābele ve def‘ini isbâtdan izhâr-ı acz edip talebiyle kızı mezbûre meclis-i şer‘a ihzâr olunup meclis-i şer‘de tahlîfe olunmağla mûcebince eşyâ-i mezkûrenin aynıları ile meblağ-ı merkūmu edâ ve teslîme mezbûre Ümmühani’ye tenbîh olunduğu mübâşiri iltimâsıyla huzûr-ı âlîlerine i‘lâm olundu. Fermân men-lehu’l-emrindir. Fî 29 Rebî‘ülâhir sene [1]154