Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 76 Hüküm no: 61 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in dükkanını kötü haliyle meşhur olan Sahak’a kiralamaktan vazgeçtiği Ma‘rûz; Üsküdar’da Arpacılar Kethudâsı el-Hâc İsmail tâife-i mezbûrdan Hüseyin ve Mustafa ve Molla Hüseyin ve sâir müseccelü’l-esâmî sekiz nefer kimesneler iskelede arpacı dükkânına mutasarrıf İbrahim muvâcehesinde mezbûr İbrahim dükkânını neccâr tâifesinden Sahak nâm zimmîye îcâr ile vermek murâd edip zimmî-i mesfûrdan bir vechile emniyetimiz olmayıp bundan akdem nizâm-ı kadîme mugāyir âhar mahâlde arpacı dükkânı ihdâs ve hilâf-ı fermân-ı âlî taşraya zahîre verdiğine binâ’en men‘ ve neccârlık san‘atını işleyip nizâm-ı kadîme mugāyir arpacı san‘atından hicr olunan zimmî-i merkūmu dükkân-ı merkūma vaz‘ murâdıyla nizâmımıza mugāyir hareket olunmamak üzere dükkân-ı merkūmu mu‘temed âhar kimesneye îcâr eylemek üzere tenbîh olunmak matlûbumuzdur dediklerinde mezbûr İbrahim dahi dükkân-ı merkūmu tâife-i mezbûrenin kethudâ ve ihtiyârlarının muhtârları olan kimesneye îcâr edip rızâları olmayan zimmî-i mesfûra îcâr etmemek üzere meclis-i şer‘de ta‘ahhüd eylediği ba‘de’t-tescîl bi’l-iltimâs huzûr-ı âlîlerine i‘lâm olundu. Fî 18 Cumâdelûlâ sene 1154