Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 81 Hüküm no: 71 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa b. Osman’ın ölen Sarraf Avakim’e olan borcu yüzünden çıkan anlaşmazlığın mahkeme yoluyla çözülmesi Ma‘rûz; Üsküdar’da sarrâf tâifesinden iken bundan akdem hâlik olan Avakim nâm zimmînin sulbî kebîr oğlu ve hasran vârisi Garih nâm zimmî hasmı Yusuf Ağa b. Osman ile mürâfa‘a-i şer‘ oldukda iki kıt‘a temessük mantûkunca üç yüz altı guruşun yetmiş guruşunu ahz ü kabz edip bâkī kalan iki yüz otuz altı guruşu kable’l-ahz hâlik olup bana mevrûs olmakla taleb ederim deyü da‘vâ etdikde mezbûr Yusuf Ağa cevâbında meblağ-ı bâkī mezbûr iki yüz otuz altı guruş ber-vech-i muharrer deyni olduğunu bi tav‘ıhî ikrâr ve i‘tirâf edip deyn-i mezkûr mukābelesinde rehni olduğunu iddi‘â edip rehin husûsu içün Dîvân-ı Âsafî’de mürâfa‘a olmak üzere zimmî-i mesfûr fermân-ı âlî ibrâz etmekle rehin da‘vâsı huzûr-ı âlîlerinde görülmek üzere havâle olunup mertebe-i ikrârı olan meblağ-ı bâkī-i mezbûr iki yüz otuz altı guruş mezbûr Yusuf Ağa’dan lâzım geldiği bi’l-iltimâs huzûr-ı âlîlerine i‘lâm olundu. Fî 20 Cumâdelûlâ sene 1154