Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 141 Hüküm no: 205 Orijinal metin no: [35b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’a bağlı Çengelköy’deki bahçıvanların rencide edilmemeleri talebi Ma‘rûz, Medîne-i Üsküdar’da ve Çengâr [Çengelköy] karyesinde vâki‘ bağçevân tâifesinden İbrahim ve Mehmed ve Halil ve Murad ve diğer Mehmed ve Ali ve Hasan nâm kimesneler ile Kiru ve Hıristo ve Kosta ve Tanaş ve Riço ve Yani ve Kiko ve Mitro ve Mihal ve Panko ve Kosta ve Hanço ve Kiru ve Tavik ve Mitro ve sâirleri meclis-i şer‘a [36a] gelip ifâde-i merâm edip aslında bağçevânlar kethudâsı olanları tâife-i mezbûreden birinin bağçe ve sâir iktizâ eden husûslarımızı ma‘rifet-i şer‘le görülürken hâlâ kethudâmız olan el-Hâc Ömer ekmeğim mukābelesinde ben kethudâyım her birinizden intifâ‘ edip ta‘ayyüş edeceğim deyü gerek Üsküdar ve gerek Çengâr karyesinde olan bağçelerimize gelip ol havâlîde bulunan subaşı ve yasakçı ve ustalara gamz ve tecrîm ve şer‘a da‘vet edenleri birer töhmet ile ithâm ederek tehdîd eylediğinden ahvâlimiz diğer-gûn olmuşdur deyü her biri tazallüm ve teşekkî etmeleriyle fîmâ-ba‘d tâife-i mezbûreden birinin nizâ‘ı ve âhar her ne husûs iktizâ ettikte kethudâ ve zâbıtân meclis-i şer‘a gelip hâkimü’ş-şer‘a ahvâli ifâde ve şer‘le cümle umûrumuz görülüp subaşı ve yasakçı ve usta ve sâir zâbıtân ile kethudâ-yı merkūm ma‘rifet-i şer‘î olmaksızın bir bağçeye varıp re‘âyâ fukarâsını rencîde ve tecrîm ettirmemek bâbında tâife-i mezbûre emr-i âlî ricâ ve niyâz ettikleri dergâh-ı adâlet-unvâna arz ve i‘lâm olundu. Fî 21 Zilka‘de sene 1154