Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 149 Hüküm no: 223 Orijinal metin no: [38b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’da Bulgurlu mahallesinden Bostanî İsmail’in alacaklı olduğu Ma‘rûz, Üsküdar’da Bulgurlu mahallesinde sâkin Bostânî İsmail Üsküdar’a muzâfe Şile kazâsında hâlik olan kasaba-i mezbûre kethudâsı Mitro zimmînin sulbî kebîr oğlu Yuvan nâm şâbb-ı emred ile ba‘de’t-terâfu‘ cihet-i deyn-i şer‘îden on guruş otuz iki para ve beş Mısır zincirli altın hâlik-i mezbûra helâkinden altı sene mukaddem ikrâz ve teslîm edip kable’l-edâ hâlik olmağla tereke-i vâfiyesinden taleb ederim deyü da‘vâ ettikte mezbûr Yuvan tereke-i hâlik-i mezbûra vaz‘-ı yedini inkâr lâkin terekeden kasaba-i mezbûrede bir mülk menzil olup kasaba-i mezbûrede büyük karındaşı ve anası menzil-i merkūmda sâkinler olup ve hâlâ anlar vâzı‘ayi’l-yed olduğunu ve kendi kürkçü şâkirdi olmağla bir kaç seneden beri bunda olup deyn-i merkūmu inkâr edicek, müdde‘î-i mezbûr müdde‘âsını lede’t-tezkiye adâletleri zâhir Ali b. Mehmed ve Hasan b. Mustafa nâm kimesneler şehâdetleriyle vech-i şer‘î üzere isbât etmeğin ba‘de’t-tahlîfi’ş-şer‘î mûcebince tereke-i vâfiyesinden verese-i mezbûrân edâya merkūm Yuvan’a tenbîh olunduğu bi’l-iltimâs huzûr-ı âlîlerine i‘lâm olundu. Fî 23 Zilhicce sene 1154