Üsküdar Mahkemesi 403 Numaralı Sicil (H. 1154-1155 / M. 1740-1742) cilt: 70, sayfa: 159 Hüküm no: 246 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezban Hatun ile Veli arasındaki alacak davasında anlaşma sağlandığı Ma‘rûz, Derûn-ı arzuhâlde mezkûrü’l-ism Kezban nâm hatun zâtı ba‘de’t-ta‘rîf sahib-i arzuhâl Veli ile Üsküdar’da meclis-i şer‘de Üsküdar hâricinde Kûh-ı Alem kurbünde Sultançiftliği demekle ma‘rûf karyede ma‘lûmü’l-hudûd vakıf menzil bedel-i ferâğı olan iki yüz guruş ve mukaddemâ iştirâ eylediği eşyâ-i ma‘lûmem olan yüz yetmiş guruş ki cem‘an üç yüz yetmiş [guruş] mukābelesinde mezbûre Kezban’a on dört re’s sığır ve elli keyl buğday ve altmış keyl alef ve elli kantar saman ve bir araba ve iki zincir ve iki balta ve iki burgu ve iki buçuk keyl mezrû‘ keten ve iki kovan ve on keyl natas? ve üç kaz ve üç Hind tavuğu ve yedi Türk tavuğu ve üç saban takımı ile kırk guruş kıymet takvîm olunan bir taraftan Kürd Hasan bostanı ve bir taraftan bir mülk? çiftlik iki tarafdan tarîk-i âm ile mahdûd bir bâb öküz ahırını mezbûre Kezban Hatun’a ma‘rifet-i mütevellî ile ferâğ eylemek üzere beynleri tevfîk ve eşyâ-i mezkûr ile ahır-ı merkūmu mezbûre Kezban kabûl edip bu vechile bâlâda mezkûr üç yüz yetmiş guruşu istifâ ve târih-i i‘lâma gelince birbiri ile vechen mine’l-vücûh da‘vâ ve husûmetleri kalmayıp eşyâ-i ma‘lûmeye ve çiftliğe müte‘allika âmme-i de‘âvîden her biri âharın zimmetini ibrâ ve ıskāt edip kat‘-ı nizâ‘ ve fasl-ı husûmet ettikleri rızâlarıyla Üsküdar’da tescîl olunup mübâşir (…) Beşe kulları iltimâsıyla vâki‘ hâl huzûr-ı âlîlerine i‘lâm olundu. Fî 23 Muharremi’l-harâm sene 1155